2021 жылы киелі оқу орны «Жоғары колледж» статусына ие болды. 2022 жылы 22-шілдеде мемлекеттік аттестаттау комиссиясының шешімі бойынша барлық мамандықтар «Үздік» бағамен аттестаттаудан өтті. 
 Қасиетті қара шаңырақтың алдыңғы толқын түлектері-Ұлы Отан соғысындағы ерлігі үшін Кеңес Одағының Батыры атағын алған Мартбек Мамыраев пен Қазбек Нұржанов. Сол сияқты педагогикалық училищені болашақ филология ғылымының докторы Ә.Болғанбаев, академик Ш.Чокин, Ағарту министрлігінің орынбасары болған А.Канафин, «КСРО және Қазақ ССР білім саласының үздігі» төсбелгісінің иегері, Қазақстан Республикасының еңбек сіңірген мұғалімі, «Білім беруді дамытуға қосқан үлесі үшін» номинациясы бойынша Қарағанды облысы әкім сыйлығының иегері, Саран қаласының құрметті азаматы,  40 жыл ұстаздық етіп оның 20 жылын осы оқу орнының директоры болып қызмет атқарған Қ.Ә. Әбікенов сияқты түлектер бітіріп шыққан. 

  Ордалы білім ордасының іргетасын қалаған қазақ бөлімінің қазіргі таңдағы келбеті мақтан етерлік. 1990 жылға дейінгі мектеп бөлімі кеңеюіне байланысты қазақ бөлімі жеке шаңырақ көтерді.